Saman med Statens vegvesen, Jernbanedirektoratet, Avinor, Nye Veier AS og Bane NOR skal Kystverket svare på fem deloppdrag som skal kartleggje utfordringar og behov i transportsektoren dei komande åra. Arbeidet med oppdraga blir styrt gjennom den tverretatlege koordineringsgruppa der Kystverket deltek med to representantar. Arbeidet med utgreiingsoppdraget vil gå føre seg våren 2026, og siste leveranse til departementa er 29. mai.
Avgrensa handlingsrom og auka fokus på samfunnssikkerhet og beredskap
Bakgrunnen for den kommande nasjonale transportplanen er at det statsfinansielle handlingsrommet vil bli avgrensa i framtida, at den sikkerheitspolitiske situasjonen er krevjande, og at Noreg har ambisiøse klimamål som påverkar alle sektorar. Departementa ønskjer at neste NTP skal utformast på ein måte som møter desse utfordringane og rammevilkåra.
Dei fem deloppdraga er:
- Utfordringsbilete og mobilitetsbehov
- Meir for pengane
- Klima og miljø
- Motstandsdyktigheit i transportsektoren
- Kartlegging av behov for kompetanse i samferdselssektoren
Kystverket skal bidra både i tverretatlege arbeidsgrupper og med sjølvstendige innspel i alle deloppdraga.
Landsdelsanalysar og involvering av interessentar
Nytt frå førre NTP-rullering er at analysen av utfordringar og mobilitetsbehov no også skal gjerast både i eit nasjonalt perspektiv og i eit landsdelsperspektiv. Føremålet er at analysane betre skal kunne fange opp utfordringar på tvers av transportformer og forvaltingsnivå, og at dei skal kunne belyse ulikskap i utfordringar mellom landsdelane. For landsdelsanalysane er Noreg delt inn i fire delar:
- Nord-Noreg (Finnmark, Troms og Nordland)
- Midt-Noreg (Trøndelag og Møre og Romsdal)
- Vest-Noreg og Sørlandet (Vestland, Rogaland og Agder)
- Aust-Noreg (Telemark, Vestfold, Buskerud, Innlandet, Oslo, Akershus og Østfold)
Transportverksemdene skal også involvere fylkeskommunar, bykommunar med byvekstavtalar og utvalde hamner i prosessen. Desse skal få kome med innspel både skriftleg og i digitale innspelsverkstader inndelte etter dei nemnde landsdelane. I tillegg vil andre aktørar, som til dømes Miljødirektoratet, bli involverte i dei deloppdraga der det er relevant.
Vidare arbeid med NTP
Når arbeidet med utgreiingsoppdraget er ferdig, vil Kystverket og dei andre transportetatane motta prioriteringsoppdraget, der vi blir bedne om å prioritere ressursbruken vår for dei komande åra. Arbeidet med prioriteringsoppdraget vil truleg starte opp i andre halvdel av 2026.