Regjeringa la i dag fram forslag til endringar i årets statsbudsjett – kalla Revidert Nasjonalbudsjett (RNB). Eitt av forslaga er å auke løyvinga til den operative utføringa av slepeberedskapen med 99,1 millionar kroner for å sikre drifta av fartøya i 2025. Kystverket administrerer slepeberedskapen, mens Kystvakta står for den operative delen. Utgiftene til drifta av fartøya har vist seg å være høgare enn berekna då Forsvaret i 2019 overtok det operative ansvaret.
Andre forslag i RNB som gjeld verksemda til Kystverket er å auke Kystverket si løyvingsfullmakt på den såkalla post 71, som er tilskotsordninga for effektive og miljøvenlege hamner, frå 176 millionar kroner til 250 millionar kroner. Handlingsrommet for å betale ut midlar i tråd med løyvinga har vore avgrensa fordi tilsagnsfullmakta har vore for låg. Auka fullmakt gjer det mogleg å imøtekome fleire søknader allereie no, og få raskare utbetalingar – som igjen reduserer mindreforbruk i framtidige budsjettår.
Det vert også foreslått å auke Kystverket si bestillingsfullmakt på post 30, som gjeld nyanlegg og større vedlikehald i den maritime infrastrukturen, med 545 millionar kroner, til 1 193 millionar kroner. Det er i den eksisterande fullmakta på 648 millionar kroner ikkje tatt høgde for at kontrakt for prosjektet Vardø fiskerihamn skulle bli inngått i år. Prosjektet blir lyst ut i 2025 i tråd med statsbudsjettet.
Prosjektet for innsegling til Borg hamn blir no kvalitetssikra (KS2). Regjeringa vil kome tilbake til denne saka når det er klart.
Elles vert staten si overtaking av kystradiotenesta også omtala.
- Les regjeringa si pressemelding om kystradiotenesta
- Les også Kystverket sin artikkel om kystradiotenesta
- Regjeringa si samleside om RNB finn du her
Kva er RNB?
Kvar vår legg regjeringa fram eit forslag til justeringar i statsbudsjettet for inneverande år. Dette blir kalla RNB (revidert nasjonalbudsjett), og Stortinget behandlar og vedtek det før sommarferien.
Vanlegvis handlar RNB om å løyse akutte eller uventa problem på kort sikt. Langsiktige utfordringar må innarbeidast i det vanlege statsbudsjettet for neste år – enten som nye satsingar (satsingsforslag) eller ved å flytte på pengar. Forslaget til statsbudsjett for neste år kjem vanlegvis i oktober og blir vedteke av Stortinget like før jul.