– Det er positivt at Flåvær fyrstasjon får ein leigetakar som DNT Sunnmøre, med erfaring og forståing for ansvaret som følgjer med. For Kystverket er vedlikehald gjennom bruk avgjerande for å ta vare på fyranlegg over tid, og dette samarbeidet gir oss tryggleik for at både bygningane og omsynet til ålmenta blir tekne vare på, seier avdelingsleiar Trond Røren i Kystverket.
DNT Sunnmøre vil utvikle Flåvær fyrstasjon som eit tilgjengeleg turmål der kystkultur, natur og friluftsliv møtest. Gjennom avtalen får DNT Sunnmøre ansvar for drift og aktivitet, i tett samarbeid med Kystverket og lokale samarbeidspartnarar.
– Flåvær fyrstasjon styrkjer vårt kystnære tilbod gjennom ei viktig utviding av padleleia, ved koplinga mellom Flåvær fyrstasjon og Toralfbuda. Etableringa av Flåvær som DNT-turmål aukar òg tilstadeveret vårt på søre Sunnmøre, i tråd med strategien vår, fortel Aleksandra Leikanger Stave, nyvald leiar for DNT Sunnmøre.
Erfaringa til Kystverket viser at vedlikehald gjennom bruk er den mest berekraftige måten å forvalte fyrstasjonane på. I dag er om lag 70 prosent av Kystverket sine fyr opne for ålmenta og drivne av frivillige organisasjonar, stiftingar eller lokale foreiningar. Fyrstasjonane blir ofte leigde ut utan ordinær husleige, mot at leigetakar tek ansvar for lettare vedlikehald, og legg til rette for bruk. Mange fyr blir nytta aktivt til overnatting, kulturformidling og ulike arrangement.
– Når fyrstasjonane blir brukte på denne måten, får bygningane ei ny rolle og meining. Det skaper liv, engasjement og lokal stoltheit, samstundes som viktig kulturarv blir teken vare på. Bruk, aktivitet og frivillig innsats er i seg sjølve ei form for vern og bidreg til at fyrstasjonane held fram med å vere levande også for framtidige generasjonar, seier Røren.
